2026 JUPAS 收生分數預測：出生潮、DSE 考生激增與競爭全數據分析

需求端三條線：出生、考 DSE、報 JUPAS

坊間成日用「17、18 年前出生人數」推斷 DSE 競爭。三條線放埋一齊，故事其實複雜得多：

出生潮點解冇變晒做考生潮？雙非世代嘅流失

對比實際數字：2005 至 2009 年出生人數升咗 44%，但對應嘅 DSE 考生（2023–2027 屆）暫時只升咗約 12%。如果淨係睇出生數字，會嚴重高估競爭增幅——所以我哋嘅推算模型唔直接用出生人數，而係用實際報考數字做需求指標。

考生回升嘅真正引擎：內地 DSE 補習產業

坊間好多評論將考生上升歸因於「高才通子女入咗香港學制」，但數據唔支持：增長最勁嘅係自修生——2025 年按年 +37% 至逾萬人，呢批人根本唔係香港學校考生。真正嘅引擎，係內地已經成行成市嘅 DSE 補習產業：據浸大新聞系《山坡》2026 年 5 月調查，單一內地補習平台已有超過 50 間機構開辦 DSE 課程（28 間集中喺廣東），深圳福田一帶聚集新東方等多間大型連鎖，將三年 DSE 課程壓縮成 8 個月至年半嘅全日「脫產」班，學費每年 20 至 30 萬人民幣。

誘因好直接：內地高考係以千萬人計嘅獨木橋，DSE 全球考生得 5.8 萬，香港的大學對呢批學生嚟講係一條錄取率高得多嘅路。部分機構仲同本地私校合作「借殼辦學」，令學生以學校考生、甚至本地生身份報 JUPAS 搶學額——教育局已表明會推出多項措施嚴厲打擊。

效果喺數據好清楚：DSE 報考人數 2022–2024 徘徊喺 5 萬人左右之後，2025 年跳升至 55,781（+9.8%），2026 年再升至逾 5.8 萬；聯招申請由 2024 年 39,298 人升至 2026 年 45,273 人，兩年累計 +15%。有前線教師觀察，呢批考生數理同中文特別強，直接推高 Level 4、5 嘅門檻（考評局回應指 DSE 採用水平參照評級，唔會因自修生成績而改變）。而八大聯招學額冇同步增加——僧多粥少，競爭自然升溫。

需求升，分數真係會升？2025 年係實證

我哋將 262 個分制可比較嘅課程，2024 同 2025 年嘅收生中位數逐個對比：

兩個結論：

1. 宏觀成立。需求升嘅年份（2025）六成課程加價，需求跌嘅年份（2024）中位數普遍回落。方向一致，冇懸念。

2. 微觀唔成立。逐個課程睇，「某課程申請人數升幅」同「該課程分數升幅」嘅相關系數只有 −0.09——即係基本無關。邊個課程升幾多，係由報嗰科嘅邊際考生質素決定，唔係報名人頭。所以任何聲稱可以逐個課程精準預測升幅嘅講法，都經唔起數據考驗。

之後幾年會點？出生數據話你知：仲有排升

出生人數 2009 年 82,095、2010 年 88,584、2011 年 95,451——即係 2027 至 2029 屆嘅適齡人口仲會逐年增加。就算雙非留港比例有限，只要「DSE 比高考易入大學」嘅誘因仲存在、內地補習體系繼續輸出考生，DSE 同聯招人數大概率繼續向上，直至 2013 年「零雙非」政策嘅出生斷崖（2013 年後本地出生回落）喺 2031 年前後先浮現。監管係最大變數：教育局打擊借殼辦學嘅措施如果收緊考生資格，升勢有機會放緩。

一句講晒：而家中四、中五嘅同學，面對嘅競爭只會比今屆更激烈。提早了解課程收分同計分方法，係最實際嘅準備。

常見問題

2026 年 JUPAS 收生分數會升定跌？

數據指向溫和上升：整體約 +2%（Best 5 類分制約 +0.5 至 +1 分），升幅應不及 2025 年，因為需求增速已由 +9% 放緩至 +5.5%。

係咪每一科都會升？

唔係。2025 年都有 19% 課程跌分。逐課程嘅變化冇辦法精準預測（實證相關性接近零），所以應該用「基線 + 緩衝」思維，唔好死信單一數字。

理大啲課程做咩好似「大跌分」？

理大 2025 年起改咗公佈口徑（逐科等級），同舊年嘅加權總分唔同尺度，直接比較會得出「暴跌」嘅錯覺。我哋嘅數據已經處理咗呢個斷層。

選科實際上點用呢啲數？

以 2025 中位數做基線，加半分至一分緩衝做 Band A 進取線；成績貼線嘅課程放 Band B；預留一至兩個明顯穩陣嘅選擇。用計算機按每科官方加權公式計自己嘅實分，好過靠估。